رمضان ياليلك نور و نهار بنور على نور
القلب كَسْرُه اتجَبَر بعد امَّا كان مكسور
مع كل سجدة صلاة قلبى كما البنُّور
يلمع بمعنى جديد .. و يشب فوق السور
يلقى خَضَار ف خَضَار و الأوليا بتدور
و الذكر لعلع عِلِى علَّى سقوف الدور
لما لعنان السما و الغاية بدر بدور
نوره ف قلب التقى واضح لكن مستور
* * *
رمضان يا شوق السَنَه يا مسَلسِل الشياطين
فاطرك ده تاجر ضنى .. باع دهبه و اشترى طين
صايمك مصاحبه الهنا .. روحه عِلَت ف الحين
لحد سابع سما .. و اهو دول بقى الفالحين
سُكَّر حضورهم هِنا .. و الباقى دول مالحين
شوفوا خصال النبى .. فيهم بقوا واضحين
شوفوا كده و دققوا .. و غنوا يا مادحين
* * *
رمضان يا والد عيد .. و جدّ عيد تانى
مره ف هواك و اتنين .. هاقول و اعيد تانى
جاى من بعيد يا قمر .. رايح بعيد تانى
فَكل لحظه فيك .. غالية و واحشانى
0 التعليقات:
إرسال تعليق