يا صباح مالوش آخر
طازه بلبن سرسوب
شلت اللى كان شايل
من خمسه لسه يدوب
شم النَفَس شمَّه
و انزاحت الغُمَّه
خد شفطه من شايه
نعناع ف ريحته حن
لصبيَّه ف شعورها
روايح الجنَّه
طايره ف نسمة هوا
و الشمس ضَوْياها
تطوى الليالى طى
و لا حاجه طوياها
يا راويين السِيَر
يا اصحاب مزاج عالى
تتمنوا لو كان لها
سيره على لسانكم
يا قصاصين الأثر
يا دلايل المحتار
تتمنوا لو كان لها
ع الرمله رسمة خُف
بنُّور إزاز جسمها
لكنها ف حسنها
أحلى معانى الضعف
يا صباح مالوش آخر
خبَّط على مسايا
فتحله و اتاخر
قال الصباح: وقتى
رد المسا: سُنَّه
قال الصباح: زعلان؟
رد المسا و قاله: حكم الإله بينَّا
قال الصباح: معلش
أصله جدع غلبان
و من زمان بردان
من كام سنه نفسه
بالشمس يتحنَّى
0 التعليقات:
إرسال تعليق