ماتقرَّبيش منِّى
أنا فاهم المقصود
ما يغُرِّكيش سنِّى
دا انا عمرى مالو حدود
عشت السنه بعشره
فيها السنه بعشره
شفت اللى ما اتشافشى
و بنيت من المتاريس
ما يعجِّز الأباليس
عشان اعيش و امشى
مش بعد دا كله
تتوقعى إنِّى
هافتح ف يوم ثغره
... عشان
عشان عيون ساهيين
من لون عسلها العسل يشك فى لونه
أو شَعر فيه الليل يتوه من الضلمه
لو مرَّه ثار ف الريح
مايحكموش مَلِكين
أو خصر لما يميل .. تميل معاه العين
أو عود عشان يتوصف محتاج لغه جديده
الحرف منها جاى من بعد سابع سما
متشال على مَلَكين
!! ألفين صلاة الزين على فكرِك العالى
دا مَهرِك ان كان دهب و ياقوت من الغالى
عشان اعيش خالى .. أدفع أنا مهرين
أنا قلبى مش متوى لكل عابره سبيل
و لا سبيل اتفتح لعطشانين الحُب
ملعون أبو ده سبيل
أصل اللى مات م العَطَش يشرب و لم يرتوى
و ان مرَّه يوم ارتوى .. يلف يجرى أوام
و يقول عليَّه : داهه .. بخيل و قلبه بخيل
عشان ينول العَطْف م اللى يلاقيه بَعدى
و يكرر اللى حصل ويَّايا فى بُعدى
و اهو كاس و داير و انا مش ناوى أشرب فيه
مش بس خايف على نفسى يا عابده النفس
خايف على الشاربين من بعديَّا لو هاشرب
و اهو درس لو تعرفى .. لو بس عندك حس
ف الحُب احِب البَشَر .. فيزيد براحنا سوا
مش آجى احب امتِلِك .. و اقطعها ميَّه و هوا
و اللى معاه الدوا لو بس عنده قلب
يمشى ف طريق الوَجَع يطبِّب المجاريح
و ان حتى طاله الوَجَع و شق ف جراحه
ف نفسه يستخسر شَرْبَه تداوى أخوه
يمشى معاه المشوار لو كان بطول النيل
!! قال إيه بخيل .. قال إيه .. كمان و قلبه بخيل
ستين بخيل .. ابعدى .. ماتقربيش منى
و ان كنت انا جنِّى خليكى إنتى ملاك
و اِعْلِى لسابع سما و بلَّغى ربِّك
و ان قالك إنى غلط
أقسم به هارضى أكون
ليكى من الأملاك
0 التعليقات:
إرسال تعليق