عَبينا أفكار وحَشينا
أكلِت دِماغنا و حواشينا
القمريا بقِت شينا
مدينا خطاوينا .. مشينا
* * *
سَكينا شِباكنا وشيشنا
والهم ساكن نخاشيشنا
عملنا ع الخلق دى شيشنا
طلع اللى حاشش حشَايشنا
هو اللى طالق فى وحوشنا
وزارع الهم ف حوشنا
واحنا اللى ياما كتير حوشنا
وحبسنا جوانا وحوشنا
وصبرنا ع الذل وحوشنا
علشان نشوف اللى واحِشنا
* * *
غيطنا طرح محشوش
وجرينا على فاشوش
واتبدلت لوشوش
وليه صبح مالهوش
* * *
وتَنى صابر على ليلك
لو مره راح يخلص عمرك
من عمرى انا اديلك
انا اللى فى العتمه
نورت اناديلك
وانا اللى فى الشده
اصرخ وانا ديلك
وانا شُريان الحياه
يا مصر انا نِيلك
0 التعليقات:
إرسال تعليق