مين اللى يقدر ع الشوارع
لما تبُخ كلابها فى وسط الزحام
و تهيج على الماشيين ف حالهم
بيطاردوا حلم الرزق و اللقمه الحلال ؟
الناس دهُم
مالهمش هَم
إلا الحيطان العاليه يمشوا ف ضلها
و مش مهم
يشمُّوا عادم
أو ودانهم يغتصبها كلام قبيح
ف البيت عيال
مستنيين المَمْ
و الكلمه لو تنقال و تجرح ودنهم
أرحم كتير
من دمعة الجوع لما تجرح
خد حد ف وِِلْدهم
و اما المخالب تنهش الهِدْمَه القديمة
و اما الجتت
تنقص حتت
طالعه مع الأنياب تشُر دم و غَلْبَنه
و اما الرقابى تدِّعِك تحت الجزم
يتعكزوا على بعضهم و يقولوا
" عادى .. الدنيا صعبه
طول عمرها الدنيا دى صعبه
الصبر طيب
الصبر مفتاح الفرج
مين اللى عارف ايه اللى جاى
ربَّك يهوِّن
ربَّك يعين "
جايز تصبَّر بعضهم
متعه حلال جوَّه السرير ببلاش كده
جايز يسافر بعضهم جوه الخيال المستحيل
إنه يقدر يطلع المصيف باتنين جنيه
أو ان كل ده كابوس
و الصبح راح يصحى ف سرير حرير
زى الأمير
يدخل فطاره
سيمون فيميه و زبده و توست
مين اللى يقدر ع الشوارع
لما كلابها تطارد الناس للأوض
و الروح تهج من المكان
جوَّه المكان
تبقى الحياه خيالات
هلوسات
مرض
و اكبر خيالاتها
حلم الأمان
0 التعليقات:
إرسال تعليق