ف بداية عام جديد
و دايما البدايه بتلمع ف العينين
و دايما البدايه متجوِّزه الأمل
زى ماكانت زمان
ف لحظة الولاده
سبب ان أب طازه
( سمَّى بنته ( أمل
و وراه جه أب تانى
( سمَّى إبنه ( أمل
رغم اختلاف ظروفهم
و فوارق السنين
لو قلنا دى تبقى صدفه
دا شىء مش مُحْتَمَل
و المحتمل أكيد
إن البدايه .. عيد
بينَعْنِش القلوب
و يصفِّى شوف عِكِر
اللى شرب كاساتها
قبل ما يشرب سِكِر
و اتوَلَدِت جوَّه عينه
نظرة إبنُه الوليد
ف بداية عام جديد
و العام طويل طويل
للِّى الأمانى عنده
كتيره كتيره خالص
يزرع .. يروى .. و يقطف
و يزرع تانى .. مرَّه
و يزرع تانى .. تانى
و ف مطلع كل شهر
يجى الهلال يعاين
و يقول يا ريتنى كنت
العام دا م البَشَر
دا انا كنت اسيب سَمايا
و ابات وسط الجناين
و العام قَصِير قَصِير
ع اللى همومه كتير
و النَّغْزَه ف قلبه جامده
يعدِّى ف لحظه واحده
زى امَّا يكون بيرمش
أو يعدل المَخَدَّه
.. و جايز يبقى طيِّب
العام دا عن اللى فات
و يطبطب فوق جراحُه
يلاقى همُّه مات
و يعيش هوَّ .. سعيد
ف بداية عام جديد
و ( جديد ) جادِت علينا
بجدودنا اللى قلوبهم
أَجْدَد من الآباء
لولاهم كنَّا تُهْنا
و كنَّا قُلنا تاء
يا عينى قبل باء
B و جايز قُلنا
الفَرْحُ فَاضَ بى
لما رنِّت ف ودنى
غنوه جديده لمنير
و اما شفت بعينيَّه
طفل ف أولى ابتدائى
ف أول يوم دراسه
بمريلته الجديده
و اما دقت بلسانى
بعد اما سَمَّى طبعا
قطمِةْ عيش الكنيسه
و لما إيدى لِمْسِت
إيد صاحب من دقايق
ما كانش لسَّه صاحب
و نَشَرِت السلام
و اما شميت بأنفى
ريحة وطنى اللى منفى
من جوَّه المُعتقل
و هوَّ جاى يخطِّى
ناحية باب الخروج
و الشمس جايه تجرى
تقابله من بعيد
ف بداية عام جديد
بقولِك يا حبيبتى
إنتى البدايه ليَّه
و انتى أعوام حياتى
و انتى دايما ف قلبى
طازه و دايما جديده
و انتى اللى خلِّتينى
أحِب الناس دهُمَّه
جيت اعيِّد .. قلت جُمله
طِلْعِت لهم قصيده
0 التعليقات:
إرسال تعليق