نجَّار مسلـَّح
**********
نجَّار مسلـَّح سقـَّالتُه
واقفه بميزان على وش البيت
و لما تحسب مسألتُه
تلقاك يا حلو قوام طبـّيت
عشرين جنيه تبقى عمولتُه
سُكـَّر تجيب ما تجيب الزيت
و لو تفكـَّر ف حكايتُه
تلقى الحياة و الموت قسمة
كتكوت فصيح
***********
كتكوت كَسَر قشرة بيضه
و قال يا دنيا: انا جاى لك جاى
!! الدنيا قالتـلُه: يا بيضه
فى فرارجى فاكرك مش نسَّاى
واقف ف إيدُه السكـِّينه
إن شالله تقعدلَك سنـتين
هايعلفك و مرسـيـِّنا
أول ما تسمن آخرك فين
ف بطننا مشوى محمَّر
كتكوتنا واقف متسمَّر
رجع لبيضته و قال: باى باى
يا يوستفندى
***********
أرجوك يا يوستفندى
ما تاكولش الكيماويـَّات
دا أخونا يوسف افندى
اللى عليه اتسمّيت
كان ياكلك تسرى و تمرى
و ما كنتش إتسمّيت
ولَّا عشان اسمى حاف
رجلى على قد لحاف
و فاضلى حبه صغار
و ادخل ف قميص الاكتاف
و أبويا عوَّاد عاش
و أبويا السقَّا مات
ما اصعبش عليك يا جميل
و ف مَرَضى اصحى و أبات
أرجوك يا يوستفندى
ما تاكولش الكيماويـَّات
الشاعر الغلبان
*************
بكتب بلاش
بقرا بلاش
و بخُر شِعر طبعا بلاش
نَفْسى تقول : خلِّيك عفيف
هو اللى ليه كلمه تهز القلب
!! ينظر للرغيف
بطَّل شحاته
إيه اللى يحصل للى يملك كلمه تعبر ألف باب
!! لما يتأخَّر ع الجواز سنتين تلاته
أسمعلها و اسرح شويه ف الكلام
القصة مش لقمه و لا نهدين
و لا قرشين ف بنك عمَّالين يزيدوا
القصه شاعر مش ف إيده الاختيار
و لا فيش شاعر ف الحياة
حريته ما هيش ف إيده
ولاد تسعه
*********
ستين سنه عدوا على قلبى
وانا لسه ف العشرين
ياللى تقول الدنيا دى حلوه
!طب قولى بس لمين ؟
مالهم و مالى الناس و ليه
بصيِّنلى ليه من فوق ؟
و كأنهم من صينى ليه
و انا وحدى م الميلامين ؟
يا خلق حد يقولهم
نهايتنا واحده و النبى
ع الأرض مدشوشين
شُبيكى لـُبيكى
*************
شُبيكى لـُبيكى
هاكْسَر عضم إيديكى
و اقطعلِك مناخيرك
و أَكَلْبـِش رجليكى
علشان تفضلى جنبى
و افضل دايما اقولِك
شُبيكى لـُبيكى
0 التعليقات:
إرسال تعليق