خمس صوابع
ممكن يمسكوا قنبله
و ممكن يقدموا كباية ميَّه
و انت اللى زهقان م الغَرَق
ما كانش ممكن تشوفهم
غير انهم بيشدُّوك لفوق
لفوق
لحد ما تطلع
من بحر الهم ده
و هما لسَّه بيشدوك لفوق
لفوق
لحد ما تطلع
م الهوا الفاسد ده
و هما لسه بيشدوك لفوق
لفوق
لفوق
لحد ما توصل لربنا
فتقوله
و الدموع ف عينيك
الحمد لك
إنك غرَّقتنى
و الحمد لك
إنك اديتنى الخيال
اللى خلانى أشوف خمس صوابع
يقدروا يعملوا أى حاجه
و الحمد لك
إنك اديتنى القدره
على تكثيفه ف حقيقه
حقيقه
تسرَّع القلب و تبطَّئه
تقشعر الجلد
تخلى العيون تلمع
تخلى الراس تتهز من الدهشه
و هى بتقرا كلام ف قصيده
انت بس
اللى اديتنى القدره على كتابتها
0 التعليقات:
إرسال تعليق